Святкаванне Дня беларускага пісьменства ў Полацку стала маштабнай і яркай дзеяй

Главное

Святкаванне Дня беларускага пісьменства ў Полацку стала маштабнай  і яркай дзеяй. Праграма юбілейных урачыстасцяў была насычана разнастайнымі мерапрыемствамі. Адно з іх — «Фестываль кнігі і прэсы», у рамках якога на плошчы Францыска Скарыны працавалі галіновыя павільёны і пляцоўкі.

На працягу двух дзён палачане і госці свята знаёміліся з лепшымі выданнямі мастацкай і вучэбнай літаратуры, кнігамі для дзяцей і юнацтва, энцыклапедычнымі даведнікамі. Вялікім попытам карысталіся выданні ўстановы Адміністрацыі Прэзідэнта Рэспублікі Беларусь, рэдакцыі газеты «Советская Белоруссия», выдавецкага дома «Звязда». Самае лепшае можна было не толькі пабачыць, але і набыць.

Кніжны набытак

Шмат зацікаўленых гледачоў сабрала ўрачыстая прэзентацыя перакладу Свяшчэннага Пісання Новага Запавета на беларускую мову. Мерапрыемства ўзначаліў Мітрапаліт Мінскі і Заслаўскі Павел, Патрыяршы Экзарх усяе Беларусі, які адзначыў, што пераклад Свяшчэннага Пісання — гэта вынік 25-гадовай працы Біблейскай камісіі Беларускай Праваслаўнай Царквы, і выказаў надзею, што гэтае выданне стане прызнаным набыткам нацыянальнай культуры Беларусі. Экзэмпляр унікальнага выдання Патрыяршы Экзарх перадаў дырэктару Нацыянальнай бібліятэкі Раману Матульскаму.
Працягам святочных мера­прыемстваў стала перадача Раманам Матульскім факсімільнага выдання «Кніжная спадчына Францыска Скарыны» дырэктару Полацкай цэнтралізаванай бібліятэчнай сістэмы Ганне Бурносенка. Рэалізацыя маштабнага праекта стала магчымай пры падтрымцы Банка БелВЭБ. І зараз палачане маюць магчымасць пазнаёміцца з багатай спадчынай славутага земляка.

Я — першадрукар!

Вялікую цікавасць выклікала ў палачан і гасцей горада дзейнасць Друкар­скага двара XVI стагоддзя. Гэта ўнікальная экспазіцыя, сабраная гісторыкам і калекцыянерам, аўтарам і кіраўніком праекта
«В поисках утраченного» Уладзімірам Ліхадзедавым. Прадстаўленыя рарырэты ўсе са шматвяковай гісторыяй. Чаго толькі не ўбачылі наведвальнікі! Афортны і пера­плётны станкі, папяровы прэс, тыгельную машыну… Усё масіўнае, вельмі цяжкае, літаральна непад’ёмнае.
Асобнае месца займала абсталяванне па ўзнаўленні самаробнай паперы з ільна, бавоўны, цэлюлозы — таксама па старадаўняй тэхналогіі. Дзеці і дарослыя падчас свята з непадробнай цікавасцю спрабавалі рабіць унікальныя экзэмпляры. І гэта атрымоўвалася! Сапраўдная жамчужына павільёна — драўляны друкарскі станок XVI стагоддзя: на такім Францыск Скарына вырабляў свае ўнікальныя кнігі. Пры дапамозе «першадрукароў» кожны жадаючы змог адчуць сябе сапраўдным нашчадкам слаўнага земляка — вырабіць друкаваны адбітак першай старонкі скарынаўскай Бібліі. Свой экзэмпляр асабіста зрабіла на памяць пра свята шмат пачэсных гасцей, сярод якіх і архіепіскап Полацкі і Глыбоцкі Феадосій.
Увогуле, кіраўнік праекта Уладзімір Ліхадзедаў прызнаўся, што не чакаў такой вялікай колькасці наведвальнікаў. За два дні палачане і госці свята зрабілі больш за тысячу адбіткаў! І гэта абсалютны рэкорд за чатырохгадовы ўдзел самабытнай друкарні ў папярэдніх святах, прысвечаных Дню беларускага пісьменства.

Слова пісьменніка

Свята пісьменства немагчыма ўявіць без кніг, а яшчэ больш — без іх аўтараў. Насычаная праграма жывых зносін чакала прыхільнікаў літаратурнай творчасці ў павільёне «Слова пісьменніка». У рэжыме нон-стоп ля свабоднага мікрафона гучалі вершы і вытрымкі з празаічных твораў у выкананні саміх аўтараў, членаў абласных аддзяленняў Саюза пісьменнікаў Беларусі, літаратурных саюзаў і суполак з розных куточкаў краіны, лаўрэатаў літаратурных прэмій. Творчыя прэзентацыі суправаджаліся зацікаўленымі зносінамі са слухачамі, якія скарысталіся магчымасцю асабіста пазнаёміцца з літаратарамі, займець кніжную навінку з аўтографам любімага аўтара.
Увогуле майстры мастацкага слова не скупіліся на творчыя падарункі для палачан і гасцей свята — «жывое» слова гучала наўкола, услаўляючы свята…



Добавить комментарий

Ваш e-mail не будет опубликован. Обязательные поля помечены *