На чарговым справаздачным дні старшынь сельскіх выканаўчых камітэтаў за сакавік гэтага года чырвонай ніткай прайшла тэма добраўпарадкавання тэрыторый, навядзення парадку на зямлі.
Праводзячы пасяджэнне, намеснік старшыні Полацкага райвыканкама Пётр Пяткевіч адзначыў, што добраўпарадкаванню тэрыторый населеных пунктаў і дарог у Полацкім раёне павінны надзяляць пільную ўвагу прадстаўнікі мясцовай сельскай улады, работнікі жыллёва-камунальных і дарожных арганізацый.
Пётр Мяфодзьевіч прапанаваў падзяліцца вынікамі праведзеных маніторынгаў па санітарным стане тэрыторый прадпрыемстваў, арганізацый, размешчаных у Полацкім раёне, галоўнаму дзяржаўнаму санітарнаму ўрачу Полацкага занальнага цэнтра гігіены і эпідэміялогіі Міхаілу Гурыновічу, намесніку начальніка Полацкага гаррайаддзела па надзвычайных сітуацыях Іллі Кошкіну, начальніку землеўпарадкавальнай службы Полацкага райвыканкама Аляксандру Гінтуфту.
Усе выступоўцы выказалі заўвагі. Маюць патрэбу ў навядзенні парадку тэрыторыі адміністрацыйных будынкаў прадпрыемстваў, кантэйнерныя пляцоўкі Ветрынскай ЖКГ, сметнікі, грамадскія студні, могілкі. Аляксандр Гінтуфт пералічыў вызначаныя ўчасткі зямлі, якія не эфектыўна выкарыстоўваюцца, а таксама назваў населеныя пункты, дзе людзі самавольна занялі зямельныя участкі.
Ішла размова і пра дамы без гаспадароў, пасля зносу якіх участак павінен быць поўнасцю вызвалены ад смецця. Пра стан прыдарожных палос дакладалі дырэктар Дрэтунскага лясгаса Сяргей Лындо і начальнік філіяла «Полацкае ДРБУ №182» Сяргей Цімашэнка. У сакавіку былі праведзены рамонты прыдарожных палос, ямачныя рамонты, і гэта праца будзе працягвацца.
Дырэктар КУП «Спецыялізаваны камбінат грамадзянскага абслугоўвання «Рытуал» Алег Коцік расказаў пра добраўпарадкаванне могілак. Прадпрыемства прыняла 190 сельскіх могілак, некаторыя з іх не маюць кантэйнерных пляцовак, патрабуюцца рамонты агароджаў. Трэба выдаляць і аварыйныя дрэвы. Гэтым зараз і заняты супрацоўнікі «Рытуала». Алег Барысавіч адзначыў, што не ўсюды на сельскіх могілках ёсць дазорцы, у гэтых кадрах назіраецца патрэба.
Далейшая размова на пасяджэнні ішла пра святкаванне Вялікадня і Дня Перамогі, а таксама абмяркоўвалася работа з абавязанымі і беспрацоўнымі асобамі.