У полацкім Музеі традыцыйнага ручнога ткацтва Паазер’я святкавалі Каляды

Культура

Зімовыя святы заўсёды адрозніваліся сваёй самабытнасцю і валодалі казачнай, нават крыху містычнай атмасферай. Гэта кавалачак нашай гісторыі, нітачка, якая аб’ядноўвае шэраг пакаленняў.

У Музеі традыцыйнага ручнога ткацтва Паазер’я адсвяткавалі Каляды. Гасцей чакалі батлейка — прадстаўленне народнага лялечнага тэатра, якое правялі супрацоўнікі музея, а таксама — знаёмства са старажытным абрадам калядавання, у якім браў удзел фальклорны гурт «Варган» з ПДУ.

Абрад заўсёды пачынаўся з прывітальнай песні і працягваўся хвалебнымі пажаданнямі гаспадару. А цэнтральным персанажам дзеі, які прыцягваў увагу большасці ўд­зельнікаў мерапрыемства, асаб­ліва дзяцей, была Каза. Дарэчы, гэты вобраз, цесна звязаны з ураджаем, сімвалізуе багацце і даб­рабыт. Трэба было ажывіць Казу і абавязкова задобрыць яе, прапанаваўшы пачастунак. Госці былі падрыхтаванымі, таму іх стараннямі мяшок для «дароў» хутка напоўніўся. Каза ацаніла падарункі і зноў радасна заскокала, жывая і здаровая.

Свята працягвалася танцамі і гульнямі. Весяліліся не толькі дзеці, але і дарослыя, якія радаваліся магчымасці далучыцца да цудоўнай традыцыі. А потым калядоўшчыкі адправіліся ў дарогу, каб несці шчасце далей па Полацку.

Арына ПРАНІКАВА, студыя журналістыкі «Медыя-Мікс».

Фота Кірыла СМАЛЯКОВА.