У лесе, непадалёку ад вёскі Цінаўка Азінскага сельсавета, знаходзіцца крыніца святой пакутніцы Ірыны (Цінаўская). У 1990-я гады яе асвяціў мясцовы святар.
Калісьці тут была абсталявана купель у выглядзе бетоннай ванны.
Але доўгія гады яна заставалася ў закінутым стане. Жыхары Цінаўкі сталі ініцыятарамі адраджэння купелі, а сельвыканкам падтрымаў гэтую прапанову. Як паведаміў кіраўнік мясцовай улады Сяргей Бірукоў, зараз мясцовыя майстры вядуць будаўнічыя работы па ўстаноўцы драўлянай купелі.
У планах — «апрануць» крыніцу разам з купеллю ў зруб, добраўпарадкаваць тэрыторыю вакол. Дарэчы, дапамагаюць і школьнікі. Сапраўдны майстар-клас па цяслярнай і сталярнай справе праводзіць для іх вопытны майстра з Цінаўкі, адзін з ініцыятараў праекта Максім Вараб’ёў.
