«Іду і вяртаюся» — так называецца выстава вядомага беларускага мастака Ягора Батальёнка, якая працуе ў Мастацкай галерэі з 17 верасня. У сувязі з павышаным інтарэсам жыхароў і гасцей горада кіраўніцтва Нацыянальнага Полацкага гісторыка-культурнага музея-запаведніка вырашыла прадоўжыць час яе экспанавання да 5 снежня.
Выстава прымеркавана да 75-годдзя майстра, які прадставіў на ёй свае найбольш значныя работы. Пазнаёміўшыся з экспазіцыяй, аматары мастацтва змогуць адкрыць для сябе мастака, жывапіс якога ўражвае вытанчанасцю градацый каларыту. Так, разглядваючы карціны «На Успенне», «Адліга» і іншыя, можна заўважыць, як святло і колер ствараюць нібыта жывую прастору. Толькі валодаючы тонкім адчуваннем прыроды мастак можа перадаць сутнасць падобных з’яў.
Усе палотны мастака створаны ў блізкай да натуральнай колеравай гаме. Ён часта малюе туманную дымку, з якой праступаюць выявы характэрных беларускіх ландшафтаў — «Вячэрняе святло», «Атока» і інш.
Сярод работ, прадстаўленых на выставе, ёсць некалькі абсалютна містычных, да прыкладу, «Высокае неба Ліплянаў» і «У памяць Аршанскай бітвы». На іх мы бачым месцы, звязаныя з правядзеннем асаблівых рытуалаў. Сюжэты карцін тояць у сабе энергетыку месцаў, якія выклікаюць жаданне разважаць аб пераходзе ў іншую рэальнасць…
Усе работы мастака літаральна «прымушаюць» наведвальніка выставы ўважліва ўгледзецца ў іх, пранікнуцца глыбінёй і прыгажосцю таго асяроддзя, у якім мы жывем.
Запрашаем на сустрэчу з высокім мастацтвам!
