Яе тэматыка, якая тычылася гісторыка-краязнаўчай дзейнасці і краязнаўства як прасторы памяці і гістарычнай рэфлексіі, ролі вуснай гісторыі ў захаванні гісторыка-культурнай спадчыны, музейных калекцый, архіваў і бібліятэк, краязнаўчых музеяў у інтэрнэт-прасторы і іншых актуальных пытанняў, выклікала вялікую цікавасць. Пацверджаннем таму з’яўляецца шырокае прадстаўніцтва: удзел у форуме бралі больш чым 50 навукоўцаў і музейшчыкаў з Беларусі, Расіі, Украіны і Азербайджана.
Прысутных на адкрыцці канферэнцыі віталі Святлана Валюшкіна, намеснік старшыні Полацкага райвыканкама, Ірына Воднева, загадчык Краязнаўчага музея Полацка, і іншыя. У сваіх выступленнях яны адзначалі важнасць захавання гістарычнай спадчыны, на якой грунтуецца падмурак сённяшняй рэчаіснасці. З гэтай задачай калектыў аднаго са старэйшых музеяў краіны спраўляецца на выдатна. Ва ўстанове праводзіцца значная навуковая работа, праходзяць музейна-педагагічныя заняткі, ладзяцца сустрэчы і новыя экспазіцыі.
Даклады закраналі шырокі спектр тэм — ад даследавання дзейнасці музея-юбіляра ў розныя перыяды да апошніх караблебудаўнікоў Полацка, ад лёсу разанскага двараніна Уладзіміра Галіцына, выпускніка Полацкага кадэцкага корпуса, да барацьбы з дзіцячай беспрытульнасцю ў Полацкім павеце, ад страчаных воінскіх пахаванняў у Полацку перыяду Першай сусветнай вайны да старых беларускіх выданняў.
У сувязі з эпідэмічнымі абмежаваннямі шэраг дакладаў быў прадстаўлены дыстанцыйна.
Перагорнута яшчэ адна старонка біяграфіі музея. Пачаўся адлік пяцігоддзя, якое аддзяляе яго ад стогадовай мяжы. Няма сумнення, што наперадзе новыя адкрыцці, творчая праца дзеля захавання полацкай мінуўшчыны.
