Аграгарадок Завозер’е Полацкага раёна запрашае сяброў на свята народнага майстэрства, вясковай абраднасці, традыцыйных ведаў і добрасуседства «ЗАВОЗЕРСКАЯ БЕРАЗУХА»

Завозер’е — сталіца смачнейшага бярозавага соку, эксклюзіўнай бярозавай кашы, цудоўнай прыроды і гасцінных людзей!

Гэта выдатная нагода вярнуцца да вытокаў вясковых традыцый,
успомніць пра свае духоўныя карані, дакрануцца да разнастайнасці жанраў народнай творча­сці, пабачыць грані непаўторнай, дзіўна багатай народнай культуры
Полаччыны.
Кожны зможа:
• прайсці праз «Прывітальную бярозавую браму», каб быць у гэтым годзе здаровым і шчаслівым. Паваражыць на вяночках, сплеценых з кветак і лісця. Павязаць сваю стужачку на Бярозку, загадаўшы пры гэтым запаветнае жаданне;
• стаць удзельнікам традыцыйных траецкіх абрадаў «Завіванне бярозкі» і «Кумаванне». Прыняць удзел у святочных карагодах;
• паўдзельнічаць у майстар-класах па традыцыйных рамё­ствах і павучыцца вырабу сапраўднага бярозавага квасу; паказаць свой спрыт у «бярозавых баталіях» пад дэвізам «Трымайся да канца» і атрымаць званне «БЯРОЗАВЫ ВОЛАТ»;  у танцавальным «народным» марафоне стаптаць не адну пару лапцей; наталіць смагу — ядроным завозерскім бярозавым сокам! а ў завяршэнні стаць удзельнікам вялікага святочнага карагода «Завозерская закрутуха»!
У праграме свята:
• Сустрэча гасцей праз «Прывітальныя бярозавыя варотцы» — «веснічкі шчасця».
• Фольк-шоу з удзелам фальк­лорных калектываў Полацкага ра­ёна. Абрад кумлення «Пакумімся, ды пасябруем» пад дэвізам «Добры сусед лепш, чым далёкі сваяк».
• Школа беларускіх танцаў ан-лайн. Усе жадаючыя змогуць навучыцца асновам беларускага народнага танца.
• Выстава-дэгустацыя дамашніх загатовак з бярозавага соку «Бярозавы FRESH».
• Народнае галасаванне і прысваенне тытула «БЯРОЗАВЫ СОКАВАР-2016».
• Гістарычны ваяж у мінулае — без машыны часу. Інтэрактыўны абрад «Бярозавае вяселле».
• Жартоўны інтэрактыўны рынг «БЯРОЗАВЫЯ БАТАЛІІ» на прысваенне тытула «БЯРОЗАВЫ
ВОЛАТ».
• Этнабатл для ўсіх жадаючых «ТАНЦУЙ — НЕ ЛЯНІСЯ, ПАКУЛЬ ЛАПЦІ НЕ ЗВЯЛІСЯ!» (танцы у лапцях, танцы на лаве і г.д.).
• Гульнёвая паляна «З бабулінага дзяцінства» (народныя гульні).
• Пляцоўка «Бярозавая АПТЭКА вяскоўца». Фотавыстава «Бярозанька-сяброўка».  Выстава драўляных вырабаў навучэнцаў УА «Завозерская СШ Полацкага раёна».
• Ствараць настрой свята пад прымаўкі і прыказкі будуць вядучыя свята — Пераплут і Шчабятуха, і галоўныя персанажы свята — Сёмік з жонкай Сёмухай.Завершыць свята вялікі карагод «ЗАВОЗЕР­СКАЯ ЗАКРУТУХА».
Жартоўны інтэрактыўны рынг«БЯРОЗАВЫЯ БАТАЛІІ» на прысваенне тытула«БЯРОЗАВЫ ВОЛАТ»

Троіца падзяляе вясну і лета. У гэты асаблівы час прырода набірае вялікую сілу і энергію. А самай спрыяльнай раслінай для падсілкоўвання станоўчай энергіі заўсёды лічыцца бярозка, якая валодае асаблівай сілай, мае моцную энергію росту, якой здольная надзяліць і чалавека. Дае здароўе, каханне, дабрабыт. Увасабляе жыццялюб­ства і стойкасць. Правілы баталіі простыя: трэба як мага мацней «пабіць» (адхвастаць) праціўніка бярозавым венікам (да апошняга лісточка на галінках). А для павышэння камічнасці дзеяння, байцам завязваюць вочы, гэта служыць яшчэ і абаронай для іх. Узрост удзель­нікаў не абмежаваны. Пераможцамі стануць самыя трывалыя. Дзе вы, волаты?
Дарагія сябры!
Запрашаем вас здзейсніць унікальны шпацыр па чароўным свяце народнай культуры, сустрэцца з сапраўднымі майстрамі і рамеснікамі, купцамі-гандлярамі, дзе вы зможаце паглыбіцца ў свет песень і танцаў. Прыняць удзел у карагодах, гульнях, абрадзе вяселля і іншых цікавых падзеях, а таксама ў нас вы можаце знайсці сапраўдных сяброў ці атрымаць веды, дзякуючы якім ствараліся сем’і, у якіх нараджаліся цуда-дзеці: волаты і прыгажуні, бо наша свята ўяўляе сабой творчыя калектывы розных пакаленняў, ажыццяўляючы ідэю пераемнасці і жыццяздольнасці традыцыйнай народнай культуры.
Выстава-дэгустацыя дамашніх загатовак з бярозавага соку «Бярозавы FRESH»
Адным з традыцыйных беларускіх народных напояў і вельмі смачным з даўніх часоў лічыўся бярозавы сок — бярозавік. Завозерцы бярозавы сок шанавалі ва ўсе часы, не губляе ён сваёй папулярнасці і зараз. Яго нарыхтоўва­юць ранняй вясной, потым закрыва­юць ў шклянкі, дабаўляючы розныя кампаненты, і наталяюць смагу пасля лазні, у час летняй касавіцы, агародна-палявых работ, частуюць ім гасцей і з задавальненнем дзеляцца рэцэптамi напояў на яго аснове: бярозава-апельсінавым, бярозава-лімонным, бярозава-парэчкавым, з сухафруктамі і чарнаслівам.
У час анамальнага спякотнага лета ГАЮЧЫ БЯРОЗАВЫ СОК —
адзін з самых хадавых і жаданых народных напояў.
А што будзеце піць гэтым летам вы?
інтэрактыўны  тэатралізаваны абрад «Бярозавае вяселле»
Больш за 40 гадоў народны фальк­лорны калектыў «Галасы спадчыны» з’яўляецца галоўным захавальнікам і носьбітам народных традыцый Полаччыны. Песні, звязаныя з традыцыйным белару­скім вяселлем, хрэсьбінамі, радзінамі, любоўныя, жартоўныя — аснова рэпертуару калектыву. Прадстаўлена гадавое кола беларускіх свят і прысвяткаў, вясельных абрадаў і сямейна-бытавых традыцый: «Вяселле», «Другі дзень вяселля», «Хрэсьбіны». У праграме калектыву — абрады земляробчага календара «Засеўкі», «Зажынкі», «Дажынкі»; фальклорныя тэатралізаваныя замалёўкі «Калядкі», «Валачобнікі валачыліся», якія існавалі ў гэтым краі. Вялікую работу калектыў вядзе і па адра­джэнні народных побытавых танцаў: карэла-фінская полька, скокі
з прыпеўкамі і г.д.
У даўнія часы часта на Сёмуху спраўлялі вяселлі, таму народны фальклорны калектыў «Галасы спадчыны» падрыхтаваў інтэрактыўны тэатралізаваны абрад «Вяселле па-багатырску», у якім будзе шмат цікавых гульняў, танцаў, песень, варожбаў і для «маладых», і для гасцей — удзельнікаў свята!