Падрыхтоўка сельскагаспадарчай тэхнікі да веснавой сяўбы — асноўная задача, якую ў гэтыя дні вырашаюць аграрыі Полаччыны. На ўсіх мехдварах сельгаспрадпрыемстваў Полацкага раёна завяршаецца рамонт трактараў і прычапной тэхнікі, якія будуць задзейнічаны ў пасяўной кампаніі 2016 года. Многія дальнабачныя кіраўнікі падрыхтаваліся да вясны загадзя: восенню, пасля ўборкі ўраджаю, калі было лепшае фінансавае становішча, адрамантавалі прычапную тэхніку, і сёння яна чакае выезду ў поле.
Сітуацыю з падрыхтоўкай тэхнікі да веснавых работ пракаментаваў намеснік начальніка па механізацыі ўпраўлення сельскай гаспадаркі і харчавання Полацкага райвыканкама Уладзімір Янкоўскі: «У нашых гаспадарках маецца 384 трактары. Напярэдадні зімы ўся тэхніка прайшла выбракоўку, спецыялісты вызначаліся з неабходнымі дэталямі, з тэрмінамі рамонту. Да 15 сакавіка ўсе сельгаспрадпрыемствы павінны выстраіць адрамантаваныя трактары і сеялкі ў лінейкі гатоўнасці. Ужо сёння можна сцвярджаць, што без праблем выедуць у поле механізатары сельгаспрадпрыемстваў: «Кушлікі», «Гараны-Агра», «ПС-Карпекі», «Мілк-Агра», «Новыя Гараны», «Палімір-Агра», «Вясна-энерга», «Полацкі аграсервіс». Завяршаецца рамонт тэхнікі ў КУСГП «Палата» і «Зялёнка». З раённага бюджэту выдаткавана дапамога ў памеры 500 мільёнаў рублёў для набыцця запчастак і паліва для гаспадарак, якія знаходзяцца ў складаным фінансавым стане. У гэтыя дні 6 гаспадарак — «Астроўшчына», «Э/б «Ветрынская», «Полацкі аграсервіс», «Захарнічы», «Палата» і «Зялёнка» — атрымаюць дадатковую дапамогу з раённага бюджэту ў памерах ад 50 да 100 мільёнаў рублёў».
Праца кіпіць
На мехдвары філіяла «Вясна-энерга» РУП «Віцебскэнерга» кіпела праца. Галоўны інжынер филияла Мікалай Фёдаравіч Грышчанка расказаў, што на рамонце сельскагаспадарчай тэхнікі і абсталявання ўсе механізатары і спецыялісты зарэкамендавалі сябе толькі са станоўчага боку. Усяго ў філіяле налічваецца больш за 245 адзінак трактарнай і прычапной тэхнікі. Амаль усе рамонтныя работы, акрамя самых складаных, завершаны.
Філіял «Вясна-энерга» штогод позна заканчвае ўборачныя работы, таму што гародніну ўбіраюць у кастрычніку, а то і ў лістападзе. Потым пачынаецца асноўная пастаноўка тэхнікі на захоўванне. Па магчымасці спецыялісты імкнуцца адрамантаваць агрэгаты адразу.
У 2012 годзе машынны двор філіяла пераехаў на новае месца — на тэрыторыю цяплічнага камбіната. У планах — зрабіць тут навес і абсталяваць пляцоўку.
Спецыялісты вялі наладку адрамантаванага абсталявання. Што датычыцца запчастак, то іх кіраўніцтва філіяла імкнецца набываць ужо восенню за ўласныя сродкі, а калі рамонт сур’ёзны — звяртаюцца па дапамогу да інвестара. Трэба адзначыць, што спецыялісты прадпрыемства-інвестара кантралююць і ход падрыхтоўкі да вясны, захаванне тэрмінаў рамонту.
Мы пазнаёміліся з сапраўднымі прафесіяналамі сваёй справы. Зваршчыкі Уладзімір Немер, Андрэй Бабкоў, слесары Уладзімір Рудзёнак і Уладзімір Норат, токар Мікалай Дарошчанак працуюць дружна, зладжана. У кожнага — свая роля, і яны імкнуцца працаваць адказна.
У філіяле сфарміраваны тры машыны тэхнічнай дапамогі, якія працуюць на палях. Працягласць тэрыторыі палёў філіяла — ад Наваполацка да мяжы з Ушацкім раёнам — 30-40 кіламетраў. Таму вельмі зручна для механізатараў, якія працуюць у полі, калі прама на месца прыедзе тэхнічная дапамога са зваркай, змазкай і палівазапраўшчык.
Па выніках працы ў 2015 годзе філіял «Вясна-энерга» атрымаў ад канцэрна «Белэнерга» сертыфікат на трактар «МТЗ-3255». Мы падзівіліся на новенькую тэхніку і пазнаёміліся з яе будучым гаспадаром — механізатарам Аляксандрам Яцэвічам. Кіраўніцтва гаспадаркі ўпэўнена, што гэты вопытны механізатар, які ўжо добра праявіў сябе на «Амкадоры», без праблем справіцца і з новым трактарам.
Па новых тэхналогіях
Добрыя ўражанні пра сябе пакінулі два маладых спецыялісты — загадчык мехдвара Аляксей Бруцкі і загадчык мехмайстэрні Міхаіл Курыленка. Маладыя спецыялісты асвойваюць новыя тэхналогіі ў працы, выкарыстоўваць сучасную аргтэхніку. Праз інтэрнэт наладжваюць сувязі з партнёрамі, хутка прымаюць заяўкі, афармляюць дагаворы. Навучыліся працаваць з навігацыйным абсталяваннем, якое кантралюе працу 57 адзінак тэхнікі. Сістэма кантролю дазваляе ўбачыць, на якой адлегласці знаходзіцца тая ці іншая тэхніка, колькі яна зрасходавала паліва. На думку кіраўніцтва філіяла, такі кантроль дапамагае дысцыплінаваць работнікаў і прадухіляе крадзеж паліва.
На палях
Цёплае надвор’е спрыяе вывазцы на палі арганічных угнаенняў. Уся прычапная тэхніка і агрэгаты скамплектаваны для гэтай неабходнай працы. У філіяле ёсць запас і мінеральных угнаенняў. Апошнім механізатары вывезуць на палі фосфар. Захаванне тэрмінаў унесення ўгнаенняў у глебу — адзін са складальнікаў паспяховага будучага ўраджаю. Пра гэта спецыялісты філіяла добра ведаюць.
