У нядзелю, 15 лістапада, прафесійнае свята адзначаць працаўнікі сельскай гаспадаркі і перапрацоўчай прамысловасці аграпрамысловага комплексу.
Заўтра лепшыя хлебаробы, механізатары, спецыялісты жывёлаводчай і раслінаводчай галін з усіх гаспадарак Полацкага раёна, працаўнікі перапрацоўчых прадпрыемстваў Полацка, ветэраны сельгасвытворчасці збяруцца ў 11 гадзін у зале Полацкага раённага Цэнтра культуры, каб ва ўрачыстай атмасферы атрымаць шчырую падзяку за добрасумленную працу.
Удзельнікаў свята чакаюць прыемныя сюрпрызы, падарункі і канцэрт ад лепшых творчых калектываў Полаччыны. Для віноўнікаў урачыстасці рыхтуюцца тэматычныя выстава і радыёгазета, будзе працаваць выязны гандаль з шырокім асартыментам кандытарскіх і кулінарных вырабаў.
Прыемныя сустрэчы, шчаслівыя ўсмешкі, кранальныя песні, дарагія сэрцу падарункі — усё гэта чакае сяльчан на свяце. Арганізатары мерапрыемства ўпэўнены, што той, хто рупліва працуе з ранку да вечара на палях, фермах і ў цэхах дзеля забеспячэння харчовай бяспекі краіны, павінен і адпачываць годна.
Урачыстасці з нагоды прафесійнага свята на бягучым тыдні праходзяць ва ўсіх сельскагаспадарчых і перапрацоўчых прадпрыемствах Полаччыны. Словы падзякі, дыпломы, прэміі і святочныя канцэрты дораць добры настрой працаўнікам сельскай гаспадаркі і перапрацоўчай прамысловасці аграпрамысловага комплексу. Са святам, дарагія!
