Дарагія сябры! Сёння апоўначы мы разам з вамі, перагарнуўшы апошні лісток календара, крочым у новы год.
Якім ён будзе? Хочацца верыць, што добрым і шчодрым, паспяховым і плённым, багатым на адкрыцці, сустрэчы і знаёмствы, дасягненні і ўдачы.
У чароўную навагоднюю ноч пад бой курантаў кожны з нас загадае запаветнае жаданне. Няхай яно абавязкова спраўдзіцца ў вас і вашых блізкіх. Няхай 2022-ы год увойдзе ў гісторыю як год узаемаразумення, адзінства і міру на Зямлі.
Чуеце? Ціхімі крокамі адыходзіць час… Давайце ўзгадаем 2021-ы і скажам яму дзякуй за яскравыя імгненні і здзейсненыя мары, памаўчым, успомніўшы пра страты. А потым пажадаем адно аднаму шчасця – на кожны з наступных 365 дзён.
…Новы год спяшаецца да нас. І няхай сабе на двары XXI стагоддзе, ён імчыць на тройцы коней. Так што ўсё па-сапраўднаму!
Дарагія нашы чытачы, шаноўныя жыхары Полаччыны! Шчыра віншуем вас з надыходзячым 2022-м годам, зычым здароўя, шчасця, дабрабыту і толькі прыемных навін!
