Сучасная пошта па-ранейшаму застаецца цэнтрам аказання спецыялізаваных паштовых і іншых запатрабаваных насельніцтвам паслуг, а таксама, асабліва на вёсцы, месцам актыўнай камунікацыі. За апошнімі навінамі, парадамі і, увогуле, за пазітыўным настроем людзі таксама прыходзяць да паштавікоў.
Цалкам апраўдвае чаканні сваіх кліентаў калектыў паштовага аддзялення «Гараны» Полацкага раённага вузла паштовай сувязі. І з самага ранку да прыкметнага будынку, у якім працуе пошта, спяшаюцца мясцовыя жыхары: хто заказны ліст адправіць, хто паштоўку ці канверт набыць, хто — плацёж па крэдыту ажыццявіць. Асаблівы наплыў людзей, зразумела, у час аплаты за камунальныя паслугі, выплаты пенсіі. Увогуле, сумаваць работнікам гаранскага АПС няма калі, у гэтым журналісты «Полацкага весніка» уласна пераканаліся. На размову ў паштавікоў часу амаль і не было. Але, менавіта назіраючы за іх працай, мы мелі магчымасць адзначыць іх высокі прафесіяналізм, добразычлівасць, уменне разумець патрэбы наведвальнікаў аддзялення, як кажуць, з паўслова.
АПС «Гараны», у якім шчыруюць чацвёра супрацоўнікаў, абслугоўвае аграгарадкі Гараны і Новыя Гараны, а таксама вёску Баравыя. «Калектыў наш з’яднаны і вопытны, узаемазамяняльнасць — адзін з прынцыпаў арганізацыі работы», — распавяла начальнік паштовага аддзялення Марына Леанідаўна Шыбут, агульны «паштовы» стаж якой складае амаль 30 гадоў. Каля чвэрці стагоддзя — такая багатая біяграфія ў сістэме паштовай сувязі ў аператара Наталлі Ананьеўны Сушчай, а таксама ў паштальёна Наталлі Аляксееўны Івановай і яе калегі Людмілы Міхайлаўны Мазай. Назапашаныя імі за дзесяцігоддзі веды і навыкі, адказныя адносіны да справы, а таксама ўласцівыя кожнай з іх выдатныя чалавечыя якасці дазваляюць з поспехам выконваць працоўныя задачы і быць прыкладам для калег. Вось і нядаўняя падпісная кампанія на даверанай іх клопату тэрыторыі прайшла з добрым вынікам.
— На «Полацкі веснік» і ўвогуле нашы вяскоўцы падпісваюцца ахвотна, а калі хто з суседзяў або знаёмых на старонкі газеты трапляе, дык набыць дадатковы экзэмпляр яшчэ і ў аддзяленне прыйдуць! — адзначыла паштальён Наталля Іванова.
Так, шчырыя чалавечыя зносіны, уменне спачуваць бядзе або радавацца поспехам бліжняга па-ранейшаму моцныя ў людзей, якія жывуць і працуюць на зямлі. Паштальёны, якія з дня ў дзень крочаць вясковымі дарогамі, гэта асабліва добра ведаюць. Ім і самім даволі часта даводзіцца дапамагаць атрымальнікам карэспандэнцыі — і словам, і справай. Каму — пэўнае выданне параіць, каму ўрача выклікаць, з кім — удалым рэцэптам падзяліцца. Такая сардэчнасць разам з высокім прафесійным майстэрствам, якое руплівы калектыў АПС «Гараны» не стамляецца ўдасканальваць (ізноў-такі ў інтарэсах спажыўцоў паштовых паслуг!), — адчувальна дапамагае яму ў рабоце, у аказанні традыцыйных і папулярызацыі новых паслуг. Напрыклад, адпраўленні «1 класс», паслугі лінейкі «Камфорт», міжнародная паскораная пошта EMS-Belpost, гандаль праз каталогі — з такімі відамі паслуг РУП «Белпошта» сяляне не проста знаёмыя, але і паспяхова карыстаюцца імі па меры неабходнасці.
«Мы працуем для людзей, — кажуць работнікі аддзялення паштовай сувязі «Гараны», — таму заўсёды рады нашым кліентам. Няхай часцей да нас прыходяць, і мы дапаможам вырашыць ім самыя розныя пытанні: ад афармлення паштовых адпраўленняў — да страхавання і нават віншаванняў ад Дзеда Мароза!»
